شاب يركب فى مايكروباص.
يركب بجانب الشاب طفل ووالدته.
الشاب يلعب فى سيجارة يلفها فى يده. يشعل السيجارة. السائق يلتفت له:
السائق:
ممنوع التدخين يا استاذ.
الشاب: أنا جمب الشباك..
السائق (بإصرار): ممنوع التدخين يا استاذ..
يظهر الاستياء على وجه الشاب ويطفئ السيجارة بيده ويظل ممسكا بها يلاعبها بين أصابعه.
الطفل بجانب الشاب يراقبه للحظات.. يسأل الشاب فجأة: ممكن سيجارة؟
الشاب: نعم؟
الطفل (بكل براءة): ممكن تدينى سيجارة؟
أم الطفل تبدو غير مهتمة بكلام ابنها, وكل من فى الميكروباص فى حالهم..والشاب ينظر حوله غير مستوعب الموقف.
الشاب: انت بتدخن؟
الطفل: لأا..بس بابا بيدخن..
يسود الصمت قليلا..
الطفل: انت بتدخن كام سيجارة فى اليوم؟
الشاب: يعنى..
الطفل: يعنى كام يعنى؟ علبة؟
الشاب: أيوة..
الطفل: بابا أقوى منك.. بيدخن علبتين كل يوم.
(يظهر الولد اصبعى النصر فى يده وهو يقول بفخر علبتين).
الشاب: ممم.
يخفى الشاب السيجارة فى جيبه.
الطفل: ممكن بقى تدينى سيجارة.
الشاب (باستغراب): لا...مش ممكن..
الطفل: ليه؟
الشاب: التدخين وحيش (بحزم)..
الطفل: ما انت بتدخن..
الشاب: وانت اما تشوف حد بيعمل حاجة وحشة تعملها؟
الطفل: يعنى انت وحيش؟
الشاب: يووه..خلاص ارحمنى..مش هادخن تانى..
الطفل: بابا برضو بيقول كدة..بس بيرجع يدخن تانى..واما يرجع..بيدخن 3 علب فى اليوم.
(يقولها الطفل ويفرد يده برقم ثلاثة بقوة)
الشاب: معلش..هو اكيد نفسه يبطل..
الطفل: انت عندك ولاد؟
الشاب: ايوة..
الطفل: اسمه ايه؟
الشاب: بنت...اسمها رانيا..
الطفل: رانيا...اسم حلو..
الشاب: متشكر..
الطفل: بتحب رانيا؟
الشاب: طبعا...مش بنتى؟
ينظر له الطفل وعيناه تبرقان..
الطفل: أنا كمان..باحب بابا اوى..
يسكت الطفل وينظر ناحية أمه ويسند رأسه على كتفها..يتنفس الشاب الصعداء أن الطفل قد سكت عن الكلام.
فجأة يلتفت له الطفل ويسأله مرة أخرى..
الطفل: ممكن بقى تدينى سيجارة؟
الشاب (بغضب): يبنى فيه ايه؟ ماينفعش تدخن..انت صغير؟
الطفل (بتحدى): يعنى اما اكبر ممكن ادخن زيكم؟
الشاب: اما تكبر ايه؟!..انت عبيط ولا بتستعبط؟..كح كح..
يختنق الشاب وه يتحدث...يخرج منديل ويضعه على فمه ويبصق فيه..يلتفت له السائق ويعطيه زجاجة مياة.
ويشرب الشاب ويعيد الزجاجة للسائق..
الشاب: شكرا
يهز السائق رأسه متفهما.
الأم تقول للسائق:
بس هنا لو سمحت..
مازال الشاب يكح ويبصق فى منديل فى يده.
يتوقف السائق بالأتوبيس.
الطفل يتأهب للنزول , لكنه يلتفت للشاب..
الطفل:بابا برضو كان بيكح زيك..بس كان بيكح دم..
ينزل الطفل من الميكروباص..والدته تتأهب للنزول خلفه.
الأم تلتفت للشاب وتتحدث ببساطة:
معلش, ماتزعلش منه..
تنزل خلفه والدته..يسيران مبتعدين عن الميكروباص...يلاحظ الشاب أن الأم ترتدى السواد.
موضوع: ممكن سيجارة !!! 
السبت سبتمبر 04, 2010 1:37 am
